الرئيسية » منوعات » ثقافة وفنون » كلام من القلب » قصيدة (جدع اسمه حسن)

قصيدة (جدع اسمه حسن)

بقلم رانا عزام
قصيدتي الليلادي حزينة
 كتبتها بدموعي المتدارية
بتحكي قصة جدع اسمه
حسن أيوه اسمه حسن
حسن أبو رقية
حسن الجدع المصري
الواد الأسمراني الخفة
 حسن اللي بيضحك
 رغم آلامه المستخبية
حسن اللي كان همه
دايما يرسم الضحكة
على شفايف البت سعدية
كات بت جميلة أوي
  بشعر أسود طويل
و بعيون عسلية
جمعها بحسن قصة حب
جميلة  و مرض لعين
 ما تنفعش معاه الأدوية
كانت تحبه و تدعيله دايما
 ربنا يشفيه و يفضل
سند ليها و لبنتها رقية
وفي يوم حزين رحل حسن
 بدمعة حزينة وبأمل عاجز
 وبرغبة مخنوقة للعيشة الهنية
رحل و عنيه على مراته و بنته
 رحل و هو بيهمس في ودن
مراته :  اكتبيني يا سعدية
 اكتبي عن آلامي و عن مرضي
اكتبي عن صناديق الإبر
 وعن علب الأدوية
 وعن روشيتات الأطبة
 و عن خلطات العطارين
وعن وصفات الخالة حمدية
اكتبيني يا سعدية
  أمانة عليكي ما تدفنيش
وجعي معايا احكي للناس
 كان هناك جدع أسمراني
حلمه بسيط أوي
أقل من أحلامهم العادية
كان بيحلم يعيش بصحة عفية
كان يحلم يشوف بته بالكوشة
 ويزفها أحلى زفة لابن عمها
الشاويش عطية
روحي لداكترتي يا سعدية
  قوليلهم حسن بيحبكم كلكم
وبيقولكم أمانة عليكم
ما ترتاحوش إلا لما تلاقو
علاج للمرض اللعين ده
للمرض النازل في خلق الله أذية
احكي لبنتي عني يا سعدية
 قوليلها كان باباكي بيحبك أوي
ده كان كتير بيجي على نفسه
 عشان يمرجحك ويلاعبك
كنت حياته كنت عيده
 كنت من الرحمن أحلى هدية
ضميني يا سعدية
ضميني يا أم رقية
خديني بحضنك غنيلي
زي ما غنتيلي يوم فرحنا
لسة فاكرة يا بت :
حسن يا خولي الجنينة يا حسن
حسن يا غالي علينا يا
حس س س ن ن ن